Па святых месцах Пскоўшчыны

У расійскі Пскоў працягваюць з’язджацца ўдзельнікі конкурсу па палявой вывучцы сярод дэсантных падраздзяленняў «Дэсантны ўзвод» у рамках «АрМГ-2018». Тым, хто ўжо прыбыў да месца правядзення спаборніцтва, была прапанавана шырокая экскурсійная праграма. Каманды-ўдзельніцы конкурсу, у тым ліку і зборная каманда сіл спецыяльных аперацый Узброеных Сіл нашай краіны наведалі гістарычныя месцы Пскова і яго навакольных мясцовасцей.

Першым прыпынкам інтэрнацыянальнага ваеннага дэсанту стаў Ізборск. Ваеннаслужачыя Алжыра, Беларусі, Венесуэлы, Кітая, Пакістана і ПАР змаглі акунуцца ў таямнічую і суровую атмасферу аднаго з самых старажытных рускіх гарадоў. Першыя ўпамінанні пра яго датуюцца 862 годам. Горад-крэпасць быў пабудаваны пскавічамі для абароны сваіх заходніх межаў.

У Ізборску знаходзіцца і жамчужына Ізборска-Мальскай даліны – Славенскія крыніцы. Гэта святое месца, якое шматлікія паломнікі называюць крыніцамі Дванаццаці апосталаў. Згодна з паданнем, кожная з крыніц мае сваю сілу і гаючыя ўласцівасці.

Пасля Ізборска наступным прыпыначным пунктам стала Пячорская крэпасць і дзеючы Свята-Успенскі Пскова-Пячэрскі мужчынскі манастыр.

Капітан Алег Някала, «Ваяр», фота аўтара

Пскоў – Мінск