Працягваецца падрыхтоўка да параду войскаў Мінскага гарнізона

Напярэдадні святкавання Дня Незалежнасці Рэспублікі Беларусь праходзіць чарговы этап падрыхтоўкі да параду войскаў Мінскага гарнізона, які традыцыйна пройдзе 3 ліпеня ў горадзе Мінску каля абеліска «Мінск – горад-герой» на праспекце Машэрава. Ваеннаслужачыя будуць удзельнічаць у ім у складзе пешай, механізаванай калон і паветранага эшалона.

Падчас першага этапу падрыхтоўкі прайшлі трэніроўкі асабовага складу ў пунктах пастаяннай дыслакацыі злучэнняў і воінскіх часцей.

У цяперашні час праводзяцца аб’яднаныя трэніроўкі з механізаванай калонай на аэрадроме Ліпкі і трэніроўкі парадных разлікаў пешай калоны ў месцах іх размяшчэння і на страявым пляцы Мінскай ваеннай камендатуры.

У складзе 18 пешых парадных разлікаў і 23 парадных разлікаў ваеннай тэхнікі прыме ўдзел больш за 3.000 ваеннаслужачых і больш за 250 адзінак баявой тэхнікі.

Традыцыйна права першым прайсці ў механізаванай калоне прадастаўлена легендарнаму танку часоў Вялікай Айчыннай вайны Т-34-85.

За танкам Т-34-85 пройдуць магутныя браніраваныя машыны, зенітныя ракетныя комплексы, артылерыйскія ўстаноўкі і сістэмы залпавага агню, якія стаяць на ўзбраенні Узброеных Сіл Рэспублікі Беларусь.

Сярод іх: танкі – Т-72Б; баявыя машыны пяхоты – БМП-2; бронетранспарцёры – БТР-70МБ, БТР-80; супрацьтанкавы ракетны комплекс БМ 9П149 «Штурм»; самаходныя гаўбіцы 2С19 «Мста-С» і 2С1 «Гваздзіка»; МАЗ-6317 з 152-мм гаўбіцамі 2А65 «Мста-Б»; 152-мм самаходныя гарматы 2С5 «Гіяцынт-С»; мабільныя зенітныя артылерыйскія комплексы 2К20 «Зеніт»; МЗКТ-500200 з 120-мм мінамётамі 2Б23 «Нона М1»; мінамётныя комплексы 2С12Б «Сані»; сістэмы рэактыўнага залпавага агню «БелГрад», «Смерч» і «Паланэз»; зенітныя ракетныя комплексы С-300ПС, «Аса-АКМ» і «Тор-М2»; ракетны комплекс «Кропка»; аўтамабілі «Багатыр», бронеаўтамабілі «Дракон», мабільны беспілотны авіяцыйны комплекс «Бусел-10».

Агульная працягласць параднага разліку тэхнікі складае каля 3.000 метраў.

Пасля праходжання механізаванай калоны ў небе над Мінскам жыхары і госці сталіцы змогуць убачыць асноўныя тыпы авіяцыйнай тэхнікі Ваенна-паветраных сіл і войскаў супрацьпаветранай абароны.

Завершыцца ваенны парад пляц-канцэртам роты ганаровай варты і выступленнем зводнага ваеннага аркестра.