Дзень войскаў супрацьпаветранай абароны

12 красавіка адзначаецца адно з прафесійных святаў Ваенна-паветраных сілаў і войскаў супрацьпаветранай абароны Узброеных Сіл Рэспублікі Беларусь - Дзень войскаў супрацьпаветранай абароны.

Упершыню Дзень войскаў СПА адзначаўся напярэдадні святкавання 30-ай гадавіны Перамогі ў Вялікай Айчыннай вайне, у адпаведнасці з Указам Прэзідыума Вярхоўнага Савета СССР ад 20 лютага 1975 года.

Наданне Дню войскаў СПА статусу прафесійнага свята стала прызнаннем ролі воінаў супрацьпаветранай абароны ў абароне паветраных межаў СССР.

Гісторыя войскаў СПА нашай дзяржавы пачынаецца восенню 1941 года, калі, у адпаведнасці з дырэктывай народнага камісара СССР ад 2 лістапада 1941 года, у Куйбышаве была сфарміравана 5-я дывізія СПА, якая пасля стала родапачынальніцай 2-й асобнай арміі СПА Рэспублікі Беларусь.

У ліпені 1960 гады на падставе дырэктывы Міністра абароны СССР ад 15 сакавіка 1960 гады на базе Мінскага раёна супрацьпаветранай абароны ствараецца 2-я асобная армія СПА, у склад якой увайшлі 27-ы Рыжскі і 11-ы Баранавіцкі корпуса супрацьпаветранай абароны.

Сёння наследнікамі слаўных традыцый воінаў СПА з'яўляюцца ваеннаслужачыя Ваенна-паветраных сілаў і войскаў супрацьпаветранай абароны.

Здабыццё дзяржаўнага суверэнітэту Рэспублікай Беларусь і фарміраванне самастойнай дзяржавы паставіла на парадак дня неабходнасць стварэння ўласных Узброеных Сіл.

У рамках гэтага працэсу, у адпаведнасці з пастановай Вярхоўнага Савета Рэспублікі Беларусь аб стварэнні Узброеных Сіл ад 16 сакавіка 1992 года 2-я армія СПА была перафарміравана ў камандаванне войскаў СПА Узброеных Сіл Рэспублікі Беларусь.

8 лістапада 2001 года Указам Прэзідэнта Рэспублікі Беларусь зацверджана рашэнне аб стварэнні адзінага віду Узброеных Сіл - Ваенна-паветраных сілаў і войскаў супрацьпаветранай абароны.

У сучасных умовах воіны супрацьпаветранай абароны займаюць годнае месца ў сістэме забеспячэння бяспекі нашай дзяржавы. Яны былі, ёсць і застануцца надзейным шчытом паветраных межаў нашай Радзімы.

У ходзе баявой вучобы ўдасканальваюцца прафесійная падрыхтоўка афіцэраў органаў ваеннага кіравання, тактыка-спецыяльная падрыхтоўка войскаў, асвойваюцца эфектыўныя спосабы барацьбы з існуючымі і перспектыўнымі сродкамі паветранага нападу.

Была выбудавана і праверана ў ходзе вучэнняў і трэніровак сістэма кіравання войскамі, якая ўключае комплексы сродкаў аўтаматызаванага кіравання беларускай вытворчасці: «Бор», «Паляна-РБ», «Нёман», «Спрут», «Рыф-Р», якая дазваляе ажыццяўляць кіраванне войскамі з аднаго каманднага пункта ў аўтаматызаваным рэжыме, з магчымасцю перадачы кіравання.

Ва ўмовах сучаснага ваенна-палітычнага становішча ў мэтах забеспячэння рэгіянальнай бяспекі ў ваеннай сферы Рэспубліка Беларусь і Расійская Федэрацыя праводзяць сумесную абарончую палітыку, адным з кірункаў якой з'яўляецца ўдасканаленне функцыянавання рэгіянальнай групоўкі войскаў (сіл). Важным элементам рэгіянальнай групоўкі войскаў (сіл), якія функцыянуюць ужо ў мірны час з'яўляецца Адзіная рэгіянальная сістэма супрацьпаветранай абароны Рэспублікі Беларусь і Расійскай Федэрацыі.

За гады існавання Узброеных Сіл Рэспублікі Беларусь воінскія часці зенітных ракетных войскаў выканалі на палігонах Рэспублікі Беларусь і Расійскай Федэрацыі больш за 280 баявых стрэльбаў па розных тыпах мішэняў. З іх больш за 250 стрэльбаў выкананы на «выдатна» і «добра».

Напружаным для гэтага віду Узброеных Сіл быў 2014 год, у якім удалося вырашыць многія задачы па павышэнню баявой гатоўнасці злучэнняў і воінскіх часцей, пашырэнню магчымасцяў у цэлым.

Сур'ёзнай праверкай гатоўнасці зенітных ракетных войскаў стала раптоўная праверка баявой гатоўнасці падраздзяленняў 15-й зенітнай ракетнай брыгады. Разлік 15-й зенітнай ракетнай брыгады, якія знаходзіўся на баявым дзяжурстве, быў перадыслакаваны на палігон Расійскай Федэрацыі «Целямба» і атрымаў за стральбу ацэнку "добра".

На Палескім палігоне трэцяя батарэя ЗРК «Тор-М2» са складу 120-й зенітнай ракетнай брыгады ўпершыню выканала баявыя пускі ў зімовых умовах, і паразіла ўсе прызначаныя мэты, на справе пацвердзіўшы высокія характарыстыкі комплексу.

Асаблівая ўвага ў ВПС і войсках СПА надаецца пытанням мадэрнізацыі ўзбраення і ваеннай тэхнікі з іх арыентацыяй на новыя тэхналогіі з улікам магчымасцяў абаронна-прамысловага комплексу дзяржавы.

У складзе 120-й зенітнай ракетнай брыгады створаны дывізіён зенітнага ракетнага комплексу «Тор-М2». Да 2020 года плануецца закупіць яшчэ некалькі ўзораў дадзенага тыпу ўзбраення.

Да канца 2015 на ўзбраенне ў 377-ы гвардзейскі зенітны ракетны полк, 1-ы і 115-ы зенітныя ракетныя палкі плануецца паступленне чатырох зенітных ракетных дывізіёнаў С-300. Вядуцца закупкі трэнажораў для ЗРК С-300.

У радыётэхнічныя войскі працягне паступаць на ўзбраенне новая тэхніка айчыннай вытворчасці: радыёлакацыйная станцыя «Раса» і сучасны радыёлакацыйны комплекс «Усход». Таксама плануецца закупка новых радыёлакацыйных станцый, у тым ліку ў Расійскай Федэрацыі.

Для павышэння эфектыўнасці прымянення авіяцыі ў ВПС і войсках СПА плануецца апрабаваць апаратуру комплекснай абароны лятальных апаратаў ад высокадакладнай зброі. Да цяперашняга часу неабходная апаратура паспяхова прайшла выпрабаванні на ААТ «558 авіяцыйны рамонтны завод» і на тэрыторыі палігона ваеннага ведамства. Дадзены комплекс дасць магчымасць ажыццяўляць пастаноўку перашкод радыёлакацыйным станцыям, не адцягваючы ўвагі лётчыка ад выканання баявой задачы.

Паступленне ў ВПС і войскі СПА новых і мадэрнізаваных узораў тэхнікі і ўзбраення дазваляе значна пашырыць магчымасці злучэнняў і воінскіх часцей па якасным выкананні задач баявога дзяжурства па супрацьпаветранай абароне.

Сёння ВПС і войскі СПА займаюць годнае месца ў сістэме забеспячэння бяспекі Айчыны, дэманструючы высокі ўзровень прафесіяналізму, зладжанасць і ўменне дзейнічаць у складаных умовах абстаноўкі.