Завяршыўся збор з ваеннаабавязанымі-аграрыямі: Міністр абароны Беларусі ўзнагародзіў удзельнікаў збору

Завяршыўся збор з ваеннаабавязанымі з ліку спецыялістаў сельгаспрадпрыемстваў: Міністр абароны Беларусі генерал-лейтэнант Віктар Хрэнін узнагародзіў удзельнікаў.

Збор праводзіўся ў адпаведнасці з даручэннем Прэзідэнта Рэспублікі Беларусь. На працягу двух месяцаў больш за 170 ваеннаабавязаных на базе 103-й Віцебскай асобнай гвардзейскай паветрана-дэсантнай брыгады прайшлі інтэнсіўны курс баявой падрыхтоўкі: здалі практычныя экзамены па агнявой, тактычнай, інжынернай, медыцынскай падрыхтоўцы. Таксама ўдзельнікі збору выконвалі задачы па прыкрыцці паўднёвых рубяжоў, уключаючы фартыфікацыйнае абсталяванне мясцовасці і патруляванне.

Міністр абароны генерал-лейтэнант Віктар Хрэнін звярнуўся да аграрыяў і адзначыў, што армейскія будні для многіх ваеннаабавязаных сталі не проста этапам у жыцці, але і сапраўднай школай адказнасці, дысцыпліны і працавітасці:

«Кожны з вас, прайшоўшы падрыхтоўку, абнавіўшы свае веды і навыкі, засвоіўшы неабходныя дзеянні, несумненна, адчуў унутраную гатоўнасць у выпадку неабходнасці выконваць задачы па абароне Радзімы.

Ва ўмовах напружанай ваенна-палітычнай абстаноўкі, якая складваецца ля межаў Рэспублікі Беларусь, ад кожнага з нас залежыць бяспека нашай краіны, а значыць — нашага дома і нашай сям’і.

У ходзе праведзеных збораў вам давялося выконваць практычныя задачы па прыкрыцці паўднёвых рубяжоў нашай краіны, фартыфікацыйным абсталяванні мясцовасці, патруляванні асабліва небяспечных напрамкаў беларуска-ўкраінскай мяжы.

Гэта дазволіла ўмацаваць прафесійныя ўменні, удасканаліць навыкі, праверыць сябе ва ўмовах, набліжаных да баявых, і яшчэ раз пераканацца, наколькі важныя дысцыпліна, сабранасць і ўзаемная падтрымка.

Асабліва каштоўна тое, што вы працавалі як адзіная каманда. У ваеннай справе многае залежыць ад узгодненасці дзеянняў, дакладнага выканання загадаў і даверу адзін да аднаго. Гэтыя якасці вы праявілі ў поўнай меры ў ходзе выканання задач.

Перакананы, што атрыманы вопыт спатрэбіцца вам і надалей — як пры выкананні воінскіх абавязкаў, так і ў паўсядзённым жыцці, бо толькі дзякуючы адказнасці, дысцыплінаванасці і працавітасці можна дасягнуць поспеху ў любой справе. Лічу, што з усімі пастаўленымі на перыяд збораў задачамі вы справіліся».

Таксама генерал-лейтэнант Віктар Хрэнін падзякаваў камандзірам і інструктарам за прафесіяналізм, патрабавальнасць і ўвагу да людзей. Асобныя словы падзякі кіраўнік абароннага ведамства адрасаваў родным і блізкім ваеннаабавязаных.

У размовах з журналістамі кіраўнік абароннага ведамства падкрэсліў, што нестандартнае рашэнне Галоўнакамандуючага Узброенымі Сіламі дасягнула сваёй мэты:

«Калі Прэзідэнт паставіў нам задачу прызваць на ваенныя зборы ва Узброеныя Сілы спецыялістаў аграрнага комплексу, было шмат чутак. Але гэты эксперымент даказаў толькі адно: калі наш Прэзідэнт прымае рашэнне, ён абапіраецца на свой каласальны вопыт, мудрасць і здольнасць прадбачыць вынік. Так яно і выйшла.

Літаральна пару тыдняў ваеннаабавязаныя прабылі на зборах, і мы ўжо з упэўненасцю маглі сказаць, што гэта нестандартнае рашэнне дасягнула сваёй мэты.

Скажу галоўнае: у нас вельмі добрыя людзі — працавітыя і адданыя сваёй Радзіме. Трэба толькі знайсці да іх падыход. З кімсьці трэба было шчыра, сумленна паразмаўляць. Для некага прыкладам былі таварышы. А хтосьці ў ходзе гэтых збораў раскрыў у сабе магчымасці, пра якія раней і не здагадваўся.

Армія заўсёды была донарам дысцыпліны: тут вучаць парадку, сабранасці, адказнасці, самастойнасці, трымаць сваё слова, дакладна, своечасова і ў тэрмін выконваць задачы. А ўсе гэтыя якасці патрэбны ім і ў грамадзянскім жыцці.

Зборы былі насычаны заняткамі па тактычнай, агнявой, інжынернай, медыцынскай падрыхтоўцы. За перыяд збораў яны сур’ёзна падцягнулі сваю страявую і фізічную вывучку. Аднавілі навыкі валодання зброяй і тэхнікай. Яны выконвалі задачы і па прыкрыцці ўчасткаў дзяржмяжы разам з нашымі дэсантнікамі, займаліся фартыфікацыйным абсталяваннем мясцовасці, ахоўвалі асабліва небяспечныя ўчасткі дзяржмяжы. І з гэтай задачай нашы людзі справіліся.

Хачу яшчэ раз падкрэсліць, што ў нас вельмі добрасумленныя людзі. Яны ўмеюць вучыцца, змяняцца, рабіць высновы. І мы здолелі пераканацца яшчэ раз: ва ўсіх нас адна агульная мэта і задача — мы павінны зрабіць нашу краіну лепшай, мацнейшай, каб нашы людзі адчувалі ўпэўненасць у будучыні. Я лічу, што зборы сваёй мэты дасягнулі. І, калі спатрэбіцца, мы гатовы гэтую практыку развіваць далей».