У Расіі стартавалі вучэнні АДКБ

На палігоне ў Расійскай Федэрацыі адбылася цырымонія адкрыцця камандна-штабнога вучэння з Калектыўнымі сіламі аператыўнага рэагавання Арганізацыі Дагавора аб калектыўнай бяспецы «Узаемадзеянне- 2026», спецыяльных вучэнняў «Пошук-2026» і «Эшалон-2026».

У вучэннях задзейнічаны воінскія кантынгенты з Беларусі, Казахстана, Кыргызскай Рэспублікі і Таджыкістана.

У цырымоніі прынялі ўдзел начальнік Аб’яднанага штаба АДКБ генерал-палкоўнік Андрэй Сярдзюкоў, намеснік Генеральнага сакратара АДКБ Мірлан Тургунбекаў, кіраўнікі воінскіх кантынгентаў і запрошаныя службовыя асобы.

Звяртаючыся да ўдзельнікаў вучэнняў, начальнік Аб’яднанага штаба АДКБ Герой Расійскай Федэрацыі генерал-палкоўнік Андрэй Сярдзюкоў сказаў:

«Сёння на тэрыторыі Расійскай Федэрацыі пачынаецца асноўнае мерапрыемства падрыхтоўкі ў гэтым годзе — сумеснае камандна-штабное вучэнне «Узаемадзеянне-2026», а таксама спецыяльныя вучэнні «Пошук» і «Эшалон».

Ён адзначыў, што якасная арганізацыя сумеснай аператыўнай і баявой падрыхтоўкі з улікам вопыту сучасных узброеных канфліктаў, а таксама нарошчванне баявога патэнцыялу Калектыўных сіл АДКБ, аснашчэнне іх сучаснымі ўзорамі ўзбраення, ваеннай і спецыяльнай тэхнікі, у тым ліку беспілотнымі сістэмамі, сродкамі разведкі, РЭБ, удасканаленне арганізацыі супрацьпаветранай абароны з’яўляюцца прыярытэтнымі напрамкамі дзейнасці ў перыяд старшынства Расійскай Федэрацыі ў Арганізацыі.

«Актуальнасць гэтага абумоўлена надзвычай складанай ваенна-палітычнай абстаноўкай у свеце. Далейшая дэградацыя міжнародных адносін, а таксама набліжэнне «зон нестабільнасці» непасрэдна да межаў нашых дзяржаў спрыяюць росту выклікаў і пагроз ваеннай бяспецы. Складаныя ўмовы дыктуюць нам неабходнасць аператыўна рэагаваць на змяненні характару і зместу вядзення баявых дзеянняў. Кіруючыся прыярытэтамі, мы ўдасканальваем кампаненты кіравання і фарміраванні Калектыўных сіл і іх гатоўнасць да дзеянняў, максімальна набліжаных да рэальных умоў сучасных узброеных канфліктаў», — сказаў генерал-палкоўнік Андрэй Сярдзюкоў.

«Шчыра хачу падзякаваць кіраўніцтву Міністэрства абароны Расійскай Федэрацыі за высокі ўзровень арганізацыі падрыхтоўкі да вучэнняў, якія дазваляюць адпрацаваць розныя вучэбна-баявыя задачы з прымяненнем шырокага спектра ўзбраення, ваеннай і спецыяльнай тэхнікі.

Упэўнены, што праводзімыя намі вучэнні будуць садзейнічаць далейшаму ўдасканаленню і павышэнню гатоўнасці Калектыўных сіл да выканання задач па прызначэнні, дазволяць прадэманстраваць рашучасць Арганізацыі і гатоўнасць сілавога кампанента да забеспячэння калектыўнай бяспекі», — адзначыў начальнік Аб’яднанага штаба АДКБ.

Камандна-штабное вучэнне з Калектыўнымі сіламі аператыўнага рэагавання «Узаемадзеянне-2026» накіравана на адпрацоўку пытанняў падрыхтоўкі і правядзення сумеснай аперацыі па лакалізацыі прыгранічнага ўзброенага канфлікту.

У ходзе спецыяльнага вучэння «Пошук-2026» будуць адпрацаваны пытанні арганізацыі і вядзення разведкі ў інтарэсах КСАР АДКБ.

Спецыяльнае вучэнне «Эшалон-2026» прадугледжвае адпрацоўку пытанняў арганізацыі матэрыяльна-тэхнічнага забеспячэння.