Міністр абароны Беларусі наведаў сацыяльна-педагагічны цэнтр Аршанскага раёна

Міністр абароны Рэспублікі Беларусь генерал-лейтэнант Віктар Хрэнін і памочнік Міністра абароны па ідэалагічнай рабоце ва Узброеных Сілах — начальнік галоўнага ўпраўлення ідэалагічнай работы Міністэрства абароны генерал-маёр Леанід Касінскі наведалі сацыяльна-педагагічны цэнтр Аршанскага раёна ў рамках рэспубліканскай дабрачыннай акцыі «Нашы дзеці».

Разам з дзецьмі ў навагодняй казцы паўдзельнічалі генералы і афіцэры. Дзеці, педагогі і ваенныя вадзілі карагоды, спявалі песенькі і шмат шчыра ўсміхаліся.

Святочную атмасферу стваралі артысты Драматычнага тэатра беларускай арміі.

***

Абавязковая частка візіту ваенных у Аршанскі цэнтр — прадметная размова аб надзённых пытаннях.

Генерал-лейтэнант Віктар Хрэнін азнаёміўся з вынікамі праведзеных у гэтым годзе абаронным ведамствам рамонтных работ у цэнтры.

Дырэктар установы Святлана Лындзіна правяла для яго азнаямленчую экскурсію.

Кіраўнік ваеннага ведамства падкрэсліў, што падтрымка цэнтра будзе прадоўжана і ў наступным годзе:

«Узаемадзеянне ў нас з вамі адпрацавана. Пастараемся не апускаць планку».

Для даведкі. Напярэдадні навагодніх святаў ваенныя наведваюць маленькіх беларусаў з падарункамі і дапамагаюць падтрымліваць у цэнтры камфортныя ўмовы для жыцця і навучання: тут за апошнія гады з’явіліся інтэрактыўная мультымедыйная панэль, новая мэбля і воданагравальнікі.

Пры падтрымцы ваенных абноўлена аблічча цэнтра: перакрылі дах, уцяплілі і пафарбавалі будынак, удасканалілі падлогавае пакрыццё, правялі мадэрнізацыю медыцынскага блока, зрабілі рамонт у групах, дзе займаюцца дзеці.

У гэтым годзе сіламі ваеннаслужачых былі выкананы работы па рамонце ўнутраных памяшканняў у будынку цэнтра.

***

У размове з прадстаўнікамі СМІ кіраўнік абароннага ведамства адзначыў, што беларускія ваенныя заўсёды прыходзяць на дапамогу тым, хто ў ёй мае патрэбу, асабліва — дзецям:

«Аршанскую зямлю прадстаўнікі Узброеных Сіл наведваюць з самага пачатку акцыі «Нашы дзеці», з 1995 года. Спачатку гэта быў Андрэеўскі дзіцячы дом, з яго закрыццём — сацыяльна-педагагічны цэнтр Аршанскага раёна.

Традыцыя напярэдадні святаў наведваць такія ўстановы не перарывалася ніколі. Нават у кавідныя часы, калі былі абмежаванні наведвання такіх цэнтраў, мы ўсё роўна рабілі відэазвароты, запісвалі казкі, перадавалі падарункі. Бо важна і каштоўна менавіта надаць увагу дзецям, якія знаходзяцца ў такіх установах.

Важна тое, што мы гэта не робім разава: на працягу ўсяго года аказваем дапамогу Аршанскаму цэнтру. Для мяне гэта перш за ўсё магчымасць прыехаць і паразмаўляць з кіраўніцтвам цэнтра, ацаніць, што мы зрабілі за год, вызначыць перспектывы, што яшчэ будзем рабіць у гэтым цэнтры.

За той час, што мы ўзаемадзейнічаем, мы аказалі дапамогу ў рамонце даху, уцяпленні і фарбоўцы фасада, адрамантаваны медыцынскі блок, месцы размяшчэння дзяцей. Гэта, вядома, не мяжа. Вядома, мы ўвесь час будзем аказваць гэтую дапамогу. Кіраўніцтва цэнтра ведае, што на працягу года яны да нас могуць заўсёды звярнуцца па дапамогу.

Але ёсць іншы важны бок гэтага пытання. Гэта, вядома, свята. І самае, напэўна, прыемнае – гэта чаканне гэтага свята. Вядома ж, дзеці рыхтуюцца, але і мы рыхтуемся. Мы прыязджаем заўсёды з добрым настроем, разам з дзецьмі радуемся, будзем вадзіць карагоды, паказваць ім казкі, дарыць падарункі. Бо дзеткі – гэта вельмі шчырыя людзі.

У гэтым цэнтры дзеці, якія воляй лёсу, дзесьці і па віне бацькоў трапілі ў няпростую жыццёвую сітуацыю. І наша задача, зразумела, аказаць ім увагу, каб яны не страцілі веру ў дабро, веру ў сябе. Каб яны ведалі, што ў нас ёсць у краіне людзі, якія заўсёды падставяць плячо, дапамогуць. І самае галоўнае, каб яны выраслі годнымі грамадзянамі нашай краіны.

Акцыя «Нашы дзеці» ў нашай краіне — гэта ўжо брэнд. За ўсімі воінскімі часцямі Узброеных Сіл замацаваны пэўныя арганізацыі, якія займаюцца работай з дзецьмі. Мы таксама робім гэта не разава, а на працягу ўсяго года ўзаемадзейнічаем, займаемся, арганізоўваем для дзяцей экскурсіі, летнія спартыўныя лагеры на базе воінскіх часцей. Прыцягваем нашы клубы пры воінскіх часцях.

Сёння важна, каб нашы дзеці раслі годнымі грамадзянамі нашай краіны, патрыётамі. У цэлым, мы кіруемся простым прынцыпам: калі мы не будзем займацца нашымі дзецьмі, то імі зоймецца хтосьці іншы. А гэтага нельга дапусціць».

Старшы лейтэнант Яўген Лапушка, «Ваяр», фота Паўла Матусевіча