У Зімбабвэ адбыліся перагаворы Міністра абароны Рэспублікі Беларусь з Міністрам абароны Рэспублікі Зімбабвэ

У Зімбабвэ адбыліся перагаворы Міністра абароны Рэспублікі Беларусь генерал-лейтэнанта Віктара Хрэніна з Міністрам абароны Рэспублікі Зімбабвэ Оппай Мучынгуры-Кашыры.

У ходзе сустрэчы кіраўнік ваеннага ведамства Беларусі генерал-лейтэнант Віктар Хрэнін адзначыў, што асновы двухбаковага ваеннага супрацоўніцтва Беларусі і Зімбабвэ былі закладзены ў Мінску ў маі 2023 года:

«Наша рабочая сустрэча ў квітнеючым вясновым Мінску ў маі 2023 года заклала асновы двухбаковага ваеннага супрацоўніцтва Беларусі і Зімбабвэ. Сёння ў сонечным Харарэ мы робім чарговы важны крок на гэтым шляху.

Асноўная мэта майго візіту — актывізацыя ваеннага і ваенна-тэхнічнага двухбаковага супрацоўніцтва паміж Рэспублікай Беларусь і Рэспублікай Зімбабвэ.

У сучасных умовах мы павінны быць гатовыя адказаць на любыя выклікі, якія нясуць пагрозу бяспецы нашых краін. І ў ваенным плане Беларусі ёсць што прапанаваць Зімбабвэ».

Міністр абароны Беларусі адзначыў, што беларускія Узброеныя Сілы гатовыя падзяліцца вопытам з зімбабвійскімі калегамі па шэрагу кірункаў:

«Беларусь у Еўропе, як і Зімбабвэ ў Афрыцы, з’яўляецца рэдкім астраўком стабільнасці ў моры канфліктаў і супярэчнасцяў, тэрарызму і трансгранічнай злачыннасці.

Узброеныя Сілы працягваюць пастаянна развівацца і ўдасканальвацца. У нас багаты вопыт, якім мы гатовыя дзяліцца з зімбабвійскімі калегамі.

Аналіз дасягнутых раней дамоўленасцяў паказвае, што асновай нашага практычнага ўзаемадзеяння можа стаць супрацоўніцтва ў галіне ваеннай адукацыі. У Вас, спадарыня Міністр, была магчымасць асабіста азнаёміцца з флагманам беларускай ваеннай адукацыі — Ваеннай акадэміяй Рэспублікі Беларусь.

Разам з тым гэта толькі частка шырокай сістэмы, якая ў поўнай меры забяспечвае патрэбы Узброеных Сіл у кваліфікаваных кадрах».

Генерал-лейтэнант Віктар Хрэнін падсумаваў, што ў развіцця ўзаемаадносін ваенных ведамстваў дзвюх краін ёсць вялікі патэнцыял:

«Мы дасягнулі разумення аб прыярытэтнасці супрацоўніцтва ў галіне ваеннай адукацыі і падрыхтоўкі асабовага складу, абмену вопытам па напрамках узаемнай цікавасці.

Галоўнае, што ў нас няма закрытых тэм для абмеркавання. Будзьце ўпэўнены, што любыя ініцыятывы або пажаданні, выказаныя зімбабвійскім бокам, будуць належным чынам і без прамаруджання разгледжаны».

У сваю чаргу, Міністр абароны Рэспублікі Зімбабвэ Оппа Мучынгуры-Кашыры адзначыла, што Рэспубліка Зімбабвэ адкрыта для новых праектаў з Рэспублікай Беларусь, у тым ліку і ў абароннай сферы:

«Адносна рэалізацыі праектаў, накіраваных на забеспячэнне бяспекі, наша абароннае супрацоўніцтва моцна прасунулася.

Сёння чарговы важны момант, бо мы падпішам пагадненне аб ваенным супрацоўніцтве.

Гэта дазволіць нам развіваць і ваенна-тэхнічнае супрацоўніцтва, і наладзіць абмен у галіне падрыхтоўкі кадраў і медыцынскага забеспячэння.

Мы ў Зімбабвэ імкнёмся да таго, каб наша з Беларуссю супрацоўніцтва пастаянна знаходзілася на высокім узроўні.

Рэспубліка Зімбабвэ намерваецца накіраваць ваеннага аташэ ў Беларусь. Гэта дазволіць нам аператыўна арганізоўваць мерапрыемствы, вызначаныя ў рамках падпісанага пагаднення.

Ва ўмовах санкцый мы змаглі кансалідаваць вакол сябе сяброў. Мы ўдзячны вам за пастаўкі сельгастэхнікі, дзякуючы якой мы не толькі наладзілі сваю сельскую гаспадарку, але і можам забяспечваць экспарт сельгаспрадукцыі ў суседнія краіны.

У той час як Зімбабвэ і Беларусь сустракаюцца з незаконнымі санкцыямі, накладзенымі заходнімі краінамі, мы не дапусцім, каб гэта стаяла на шляху навукова-тэхнічнага прагрэсу і перашкаджала развіццю незалежных абласцей эканомікі. У такіх умовах двухбаковае супрацоўніцтва можа будавацца на асновах узаемаабмену».

Па выніках перагавораў кіраўнікі ваенных ведамстваў Рэспублікі Беларусь і Рэспублікі Зімбабвэ падпісалі міжведамаснае пагадненне аб ваенным супрацоўніцтве.

***

Міністр абароны Беларусі генерал-лейтэнант Віктар Хрэнін прыняў удзел у цырымоніі ўскладання вянка да Магілы Невядомага Салдата ў мемарыяльным комплексе «Акр нацыянальных герояў» у Харарэ.

«Акр нацыянальных герояў» — месца пахавання і нацыянальны помнік. Комплекс уключае магілу Невядомага Салдата, Вечны агонь, запалены на святкаванні Дня Незалежнасці ў 1982 годзе і які ўвасабляе дух незалежнасці Зімбабвэ, а таксама музей, прысвечаны ўздыму нацыянальнай самасвядомасці ў Зімбабвэ і антыкаланіяльнай барацьбе.

Мемарыял створаны, каб увекавечыць памяць аб партызанах Патрыятычнага фронту, якія загінулі падчас вайны ў Радэзійскім бушы, а таксама сучасных зімбабвійцаў, чыя адданасць і вернасць сваёй краіне вартыя іх пахавання ў гэтым свяцілішчы.