Адбылося адкрыццё аб’ектаў інфраструктуры ваенных гарадкоў і жылля для ваеннаслужачых

Міністр абароны Рэспублікі Беларусь генерал-лейтэнант Віктар Хрэнін на тэрыторыі 38-й Брэсцкай асобнай гвардзейскай дэсантна-штурмавой брыгады адкрыў сталовую, у будынку якой прайшоў капітальны рамонт.

Абноўленая сталовая абсталявана сучасным тэхналагічным абсталяваннем і ўсім неабходным для прыёму ежы і камфортнага размяшчэння ваеннаслужачых. Прапускная здольнасць аб’екта перавышае 800 чалавек.

Кіраўнік ваеннага ведамства адзначыў, што Міністэрствам абароны працягваецца рэалізацыя комплексу мер па павышэнні прэстыжу воінскай службы ў адпаведнасці з даручэннем Прэзідэнта Рэспублікі Беларусь Аляксандра Лукашэнкі.

У размове з прадстаўнікамі СМІ Міністр абароны Рэспублікі Беларусь генерал-лейтэнант Віктар Хрэнін адзначыў, што ва Узброеных Сілах удзяляецца самая пільная ўвага развіццю інфраструктуры ваенных гарадкоў і забеспячэнню жыллём ваеннаслужачых:

«Сёння ваенныя гарадкі паступова набываюць сучасны выгляд. Мы гэта робім, разумеючы тое, што пытанні баявой і мабілізацыйнай гатоўнасці, іх эфектыўнасць шмат у чым залежаць ад тых умоў, у якіх знаходзяцца і размяшчаюцца нашы людзі.

Таму ўдасканаленне такіх аб’ектаў, як жыллёва-казарменны фонд, сталовыя, паркавыя, складскія зоны, заўсёды знаходзіцца пад пільнай увагай, пастаянна вядуцца работы па іх утрыманні і прывядзенню ў парадак.

На сённяшні дзень ва Узброеных Сілах на ўліку знаходзіцца больш за 6700 розных аб’ектаў. Створаны сістэмы, у рамках якіх штогод, вясной і восенню, адбываецца абследаванне ўсіх гэтых будынкаў і адпаведнымі камандзірамі прымаюцца рашэнні па іх змесце, ўдасканаленні або правядзенні рамонту. За гэты год праведзены і яшчэ вядуцца работы на больш чым 400 розных аб’ектах.

Яшчэ адна з прыярытэтных задач павышэння прэстыжу воінскай службы — будаўніцтва арэнднага жылля. Гэтае пытанне знаходзіцца на асабістым кантролі нашага Прэзідэнта.

Мы выдатна разумеем, што сёння, калі створаны добрыя ўмовы для сям’і, побыту, ад гэтага будзе шмат у чым залежаць, як ваеннаслужачы будзе выконваць задачы. У гэтым годзе ўжо пабудавана і перададзена нашым ваеннаслужачым больш за 570 арэндных кватэр.

Сёння святочны настрой не толькі ў Брэсцкім гарнізоне: адкрываецца новы дом з арэндным жыллём у Старых Дарогах, пасля капітальнага рамонту ўведзена ў эксплуатацыю чарговая казарма ў Ваеннай акадэміі.

І гэтая сталовая, дзе мы сёння з вамі прысутнічаем, ужо па традыцыі напярэдадні 7 лістапада, а яшчэ супала так, што і напярэдадні гадавіны ўтварэння 38-й Брэсцкай асобнай гвардзейскай дэсантна-штурмавой брыгады, стала падарункам для нашых дэсантнікаў».

****

У Старых Дарогах больш за 35 сем’яў ваеннаслужачых Слуцкага гарнізона атрымалі ключы ад арэндных кватэр.

З радаснай падзеяй навасёлаў павіншаваў начальнік Генеральнага штаба Узброеных Сіл — першы намеснік Міністра абароны Рэспублікі Беларусь генерал-маёр Павел Муравейка.

Шматкватэрны дом размешчаны ў новым раёне з развітой інфраструктурай: у крокавай даступнасці знаходзяцца крамы, бальніца, фізкультурна-аздараўленчы комплекс, школа і дзіцячы сад.

Пасля ўрачыстай цырымоніі генерал-маёр Павел Муравейка пабываў у гасцях у сям’і маёра Арцёма Юркевіча і ўручыў навасёлам каштоўныя падарункі.

Размаўляючы з журналістамі пасля мерапрыемства, начальнік Генеральнага штаба Узброеных Сіл — першы намеснік Міністра абароны Рэспублікі Беларусь генерал-маёр Павел Муравейка адзначыў, што забеспячэнне ваеннаслужачых жыллём — адзін з прыярытэтных напрамкаў у пытаннях будаўніцтва і развіцця Узброеных Сіл:

«Важнае месца займае дзяржаўная палітыка, якая праводзіцца ў нас у краіне — стаўка на забеспячэнне ўсіх ваеннаслужачых, якія маюць патрэбу ў паляпшэнні жыллёвых умоў, арэндным жыллём.

Сёння мы адкрылі чарговы службовы дом на 40 кватэр, дзе ваеннаслужачыя радыяцыйнай, хімічнай і біялагічнай абароны і аўтамабільнай службы атрымалі новыя добраўпарадкаваныя кватэры.

Гэта адзін з этапаў рэалізацыі праграмы па забеспячэнні жыллём ваеннаслужачых, аддаленых ад абласных цэнтраў гарнізонаў. Упэўнены, што дадзеная палітыка прынясе свой плён».

****

На факультэце павышэння кваліфікацыі і перападрыхтоўкі кадраў Ваеннай акадэміі Беларусі адбылося ўрачыстае адкрыццё казармы пасля капітальнага рамонту.

У цырымоніі прынялі ўдзел намеснік Міністра абароны генерал-маёр Аляксандр Навуменка і начальнік Ваеннай акадэміі Беларусі генерал-маёр Андрэй Гарбаценка.

У двух размяшчэннях казармы могуць размясціцца 120 і 132 ваеннаслужачых. Памяшканні аснашчаны сучасным абсталяваннем і мэбляй, што дазваляе з камфортам размясціць асабовы склад.

Адкрыццё новых і рэканструяваных аб’ектаў ва Узброеных Сілах напярэдадні Дня Кастрычніцкай рэвалюцыі — добрая традыцыя, якая рэалізоўваецца па ўсёй Беларусі.

Фота: Уладзімір Бліноў, Анастасія Банэт, Павел Сурынаў «Ваяр»