У Таджыкістане стартавалі вучэнні АДКБ «Непарушнае брацтва — 2025» і «Бар’ер-2025»

Ва ўрачыстай цырымоніі адкрыцця прынялі ўдзел Генеральны сакратар АДКБ Імангалі Тасмагамбетаў, начальнік Аб’яднанага штаба АДКБ генерал-палкоўнік Андрэй Сердзюкоў, прадстаўнікі Узброеных Сіл Беларусі, Казахстана, Кыргызстана, Расіі і Таджыкістана.

Кіруе беларускім кантынгентам намеснік камандуючага сіламі спецыяльных аперацый Узброеных Сіл палкоўнік Аляксей Ялфімаў.

Каментарый палкоўніка Аляксея Ялфімава:

«Кантынгент ад сіл спецыяльных аперацый Узброеных Сіл, а канкрэтна міратворчая рота, сумесна з прадстаўнікамі МУС нашай краіны адпрацуюць увесь комплекс задач, якія будуць ускладзены на калектыўныя міратворчыя сілы.

Гэта і праца на КПП, суправаджэнне гуманітарных грузаў, адбіццё нападзення на калону, і ўвесь спектр задач, які быў вызначаны сёння штабам кіраўніцтва АДКБ.

Міратворчая рота 103-й Віцебскай асобнай гвардзейскай паветрана-дэсантнай брыгады ўжо не раз прымала ўдзел у такіх вучэннях. Узаемадзеянне з калегамі з краін — удзельніц АДКБ наладжана. У ходзе манеўраў мы пакажам сваё майстэрства».

Падпалкоўнік Алег Някала «Ваяр», фота аўтара