Пасяджэнне Савета бяспекі Рэспублікі Беларусь

У Палацы Незалежнасці ў Мінску сёння прайшло пасяджэнне Савета бяспекі.

Падчас пасяджэння Савета бяспекі Кіраўнік дзяржавы звярнуў увагу, што асобныя дзяржавы, якія імкнуцца паказаць сваю значнасць і прэтэндуюць на ролю рэгіянальных лідараў, працягваюць нагнятаць абстаноўку вакол Беларусі:

«На пасяджэнні Савета бяспекі разгледзім пытанні планавання абароны нашай дзяржавы на сярэднетэрміновую перспектыву.

За апошнія гады ваенна-палітычная абстаноўка вакол краіны змянілася і, на жаль, не ў лепшы бок, як мы ўсе адзначаем і канстатуем, перш за ўсё ваенныя спецыялісты. Не сакрэт, што галоўнай тэндэнцыяй цяперашняга моманту з’яўляецца накапленне канфліктнага патэнцыялу ў розных рэгіёнах свету».

«Вы ведаеце гэта добра: дзеянні НАТА і асабліва падзеі на паўднёвым флангу, Украіна. Пры гэтым нарастае дэструктыўная рыторыка еўрапейскіх краін адносна Беларусі. Што сведчыць аб няспынных спробах аслабіць унутрыпалітычную сітуацыю ў нашай краіне».

«Яшчэ раз хачу падкрэсліць: нам самазаспакойвацца ні ў якім разе нельга. Нібыта спакойна, людзі зразумелі, многае пераацанілі. Многія з тых, хто думаў інакш у 2020 год і раней, думаюць сёння зусім па-іншаму. Таму нібыта спакойна і добра. Ні ў якім разе нельга расслабляцца. Не трэба думаць, што мы разумныя і бога за бараду ўзялі, а ўсе вакол нас, асабліва ў НАТА, у Амерыцы, дурні. Не, гэта вопытныя людзі з моцнай сілай, таму нам расслабляцца нельга».

Прэзідэнт Беларусі Аляксандр Лукашэнка адзначыў, што беларуская армія нікому не пагражае і з’яўляецца інструментам недапушчэння вайны, а ў выпадку агрэсіі павінна быць здольная яе адбіць:

«У гэтым і заключаецца асноўнае прызначэнне ваеннай арганізацыі дзяржавы.

Будзем прымаць і пэўныя папераджальныя дзеянні, каб нашы верагодныя праціўнікі і сапернікі разумелі, што з намі лепш не звязвацца, што з намі трэба жыць дружна. Мы на гэта нацэльваем усю палітыку нашай дзяржавы».

***

Дзяржаўны сакратар Савета бяспекі генерал-лейтэнант Аляксандр Вальфовіч расказаў пра ваенна-палітычную абстаноўку вакол Беларусі:

«Ваенна-палітычная абстаноўка, якая складваецца вакол Беларусі, на жаль, працягвае нагнятацца. Тыя дзеянні, якія робяцца, перш за ўсё, Злучанымі Штатамі Амерыкі і кіраўніцтвам блока НАТА вакол нашай краіны, не могуць выклікаць спакой».

Паводле слоў дзяржсакратара, у Беларусі фіксуюць агрэсіўныя дзеянні з іх боку, якія накіраваны як раз на дэстабілізацыю абстаноўкі ўнутры нашай краіны. Аднак ініцыяваныя імі палітычныя і эканамічныя меры не далі таго выніку, на які яны разлічвалі, і цяпер стаўка робіцца ў большай ступені на ваенную актыўнасць, ваенны складальнік.

У довад гэтаму прыведзены шэраг дадзеных:

на тэрыторыі ўсходне-еўрапейскага рэгіёну на пастаяннай аснове знаходзяцца групоўкі колькасцю звыш 32 тыс. чалавек, там размешчаны 17 батальённа-тактычных груп, прычым 11 – непасрэдна каля граніц Польшчы і краін Балтыі з Беларуссю;

колькасць авіяцыйнай групоўкі хістаецца ў межах 2200 – 2230 баявых самалётаў, з іх каля 1120-1130 самалётаў на пастаяннай аснове знаходзяцца на аэрадромах Польшчы і краін Балтыі;

цяпер на тэрыторыі Еўропы праходзяць 3 буйныя вучэнні, адно з якіх у Літве, гэта значыць у непасрэднай блізкасці ад беларускай граніцы;

акрамя таго, пастаянна фіксуюцца палёты разведвальнай авіяцыі.

Генерал-лейтэнант Аляксандр Вальфовіч расказаў пра абстаноўку на паўднёвых граніцах Беларусі, адзначыўшы, што колькасць беларускіх груповак на паўднёвым кірунку ў разы меншая, чым з украінскага боку. Бо толькі паблізу дзяржаўнай граніцы з Беларуссю знаходзіцца групоўка каля 15 тыс. чалавек, уключаючы ваеннаслужачых УС Украіны, паліцыю, унутраныя войскі і Нацыянальную гвардыю.

«А калі паглядзець у аператыўную глыбіню, то каля 100 тыс. – 110 тыс. ваеннаслужачых знаходзіцца побач з нашай паўднёвай граніцай. Таму ўсе гэтыя пагрозы, вядома, неабходна разглядаць і своечасова рэагаваць», – падкрэсліў генерал-лейтэнант Аляксандр Вальфовіч.

***

Прэзідэнт Беларусі Аляксандр Лукашэнка на пасяджэнні Савета бяспекі зацвердзіў Задуму абароны дзяржавы.

Каментарый Міністра абароны Рэспублікі Беларусь генерал-лейтэнанта Віктара Хрэніна:

«Мінулая нарада была прысвечана чарговаму этапу планавання абароны нашай дзяржавы.

Кіраўніку дзяржавы мы прадставілі Задуму абароны нашай краіны, якая стане асновай у наступным рашэнні на абарону і дазволіць Генеральнаму штабу і ўсім дзяржаўным органам кіравання, якія ўдзельнічаюць у распрацоўцы гэтай Задумы, прыступіць да планавання абароны, або, па-простаму кажучы, абароны нашай дзяржавы ў выпадку ўзнікнення агрэсіі.

Прадстаўленая Задума была распрацавана на аснове глыбокага аналізу і падзей па выніках каляровай рэвалюцыі 2020 года, аналізу спецыяльнай ваеннай аперацыі, а таксама змяненняў, якія адбыліся і зацверджаны Усебеларускім народным сходам, Канцэпцыі нацыянальнай бяспекі і Ваеннай дактрыны.

У распрацоўцы Задумы прымалі ўдзел тыя дзяржаўныя органы, якія адказваюць за пытанні нацыянальнай бяспекі.

У наступным нам трэба будзе больш падрабязна заняцца планаваннем, вызначыць ролю і месца кожнага дзяржаўнага органа, ды і кожнага грамадзяніна нашай краіны ў забеспячэнні абароны нашай дзяржавы, зыходзячы з прынцыпаў неабходнай дастатковасці, і вядома ж, з эканамічных магчымасцяў нашай дзяржавы.

Гэта планавая праца. Наша мэта – стварыць умовы недапушчэння ваеннай агрэсіі і ўцягвання нашай краіны ў вайну. А ў выпадку, калі гэта адбудзецца — даць надзейны адпор».

***

«У рамках пасяджэння Савета бяспекі Прэзідэнт зацвердзіў сістэмны дакумент, які з’яўляецца асновай стратэгічнага планавання абароны. Гэта Задума абароны дзяржавы», – заявіў начальнік Генеральнага штаба Узброеных Сіл – першы намеснік Міністра абароны Рэспублікі Беларусь генерал-маёр Павел Муравейка.

Генерал-маёр Павел Муравейка раскрыў дэталі новай Задумы абароны Беларусі:

«У ёй прадстаўлены пяць асноўных стратэгічных напрамкаў. Гэта зніжэнне ўзроўню ваеннай небяспекі і папярэджанне ваенных канфліктаў, гэта значыць тыя дзеянні, якія будуць прымацца намі ў палітычнай, эканамічнай, інфармацыйнай і ваеннай сферы для таго, каб гэта забяспечыць.

Гэта падрыхтоўка дзяржавы да абароны, якая ахоплівае ўсе сферы, пачынаючы ад эканомікі і заканчваючы ваеннай сферай. Гэта варыянты ўзброенай абароны нашай краіны пры розных сучасных канфліктах. А таксама пытанні па падрыхтоўцы эканомікі дзяржавы і дзяржавы ў цэлым да функцыянавання ва ўмовах вядзення ваенных дзеянняў.

Немалаважная ўвага ўдзелена такому аспекту, як падтрыманне міжнароднага міру і бяспекі і ліквідацыя рознага роду з’яў, якія могуць паўплываць на бяспеку нашай краіны.

Усе гэтыя напрамкі падрабязна распісаны ў Задуме. Вызначаны адпаведныя дзяржаўныя органы, якія будуць іх рэалізоўваць, вызначаны комплекс мер, усё гэта ў наступным зменіцца і рэалізуецца ў План абароны Рэспублікі Беларусь.

Мы распрацавалі Задуму на 2026-2030 год, што ў прынцыпе супадае з падыходамі да планавання фінансава-эканамічнага развіцця краіны, сацыяльна-палітычнага развіцця. Пасля ажыццяўлення планавання мы падыдзем да пытання змены расходаў на абарону. З’явіцца аб’ём матэрыяльных рэсурсаў, якія неабходныя для рэалізацыі Плана. З’явяцца адпаведныя сумы і будзе створана праграма мэтавага метаду планавання, якая дазволіць дакладна рэгламентаваць і размеркаваць бюджэт для рэалізацыі гэтых задач».

Фота Арцёма Берасцяня і з афіцыйнага сайта Прэзідэнта Рэспублікі Беларусь