Урачыстая цырымонія прыняцця новым папаўненнем Ваеннай прысягі

Сёння ў краіне праходзіць урачыстая цырымонія прыняцця новым папаўненнем Ваеннай прысягі.

***

Больш за 2000 навабранцаў 72-га гвардзейскага Аб’яднанага навучальнага цэнтра прынялі Ваенную прысягу.

Міністр абароны Беларусі генерал-лейтэнант Віктар Хрэнін павіншаваў ваеннаслужачых з гэтай знамянальнай падзеяй.

«У нашай краіне памятаюць і шануюць подзвіг пакалення пераможцаў. А нам з вамі выпала не толькі памятаць і шанаваць, але і прыняць эстафету ад тых, хто абараніў нашу зямлю ў грозныя гады вайны, і абараняць суверэнітэт і незалежнасць Беларусі ў сучасных няпростых умовах», – заявіў кіраўнік ваеннага ведамства, выступаючы перад новым папаўненнем.

Міністр абароны адзначыў, што, нягледзячы на напружаную сітуацыю каля нашых граніц, у Беларусі забяспечаны мір, стабільнасць і бяспека, і падкрэсліў, што Узброеныя Сілы добра навучаны, аснашчаны сучаснымі ўзорамі ўзбраення і ваеннай тэхнікі, у іх створаны аптымальныя ўмовы для паўсядзённага жыцця і службы.

Генерал-лейтэнант Віктар Хрэнін звярнуў увагу на тое, што галоўнае ў арміі – гэта людзі, якія выконваюць вучэбна-баявыя задачы, якія нясуць баявое дзяжурства, забяспечваючы мірную працу грамадзян:

«Служба ў арміі для кожнага маладога чалавека – гэта не толькі абавязак выканаць свой канстытуцыйны доўг, але і магчымасць навучыцца абараняць сваіх родных і блізкіх, сваю Радзіму, стаць сапраўдным абаронцам Айчыны.

Сёння, прыняўшы прысягу, вы зрабілі складаны і адначасова вельмі адказны крок у вашым жыцці.

Шлях станаўлення абаронца Радзімы – гэта цяжкая мужчынская работа. У далейшым у вас напружаная баявая вучоба, удзел у вучэннях, асваенне сучаснай тэхнікі. Будзе нялёгка, часам – вельмі складана. Але я ўпэўнены ў тым, што ў страі стаяць сапраўдныя мужчыны, сапраўдныя патрыёты. Вам усё пад сілу.

Побач з вамі заўсёды будуць вашы калегі, вопытныя камандзіры, сябры, якія заўсёды дапамогуць, падкажуць і навучаць нялёгкаму ваеннаму рамяству».

Таксама генерал-лейтэнант Віктар Хрэнін падзякаваў бацькам за выхаванне сыноў:

«Я выказваю вам асаблівую ўдзячнасць за цярпенне і тыя намаганні, якія вы прыклалі да выхавання сыноў, выгадаваўшы іх сапраўднымі грамадзянамі сваёй краіны, якія разумеюць значнасць службы ва Узброеных Сілах для забеспячэння бяспекі Радзімы.

Давайце будзем разам падтрымліваць нашых сыноў, дапамагаць ім пераадольваць цярністы шлях узмужнення. Няхай вашы сустрэчы з сынамі будуць напоўнены радасцю ад іх мужчынскай і воінскай сталасці і гонарам за іх поспехі».

***

Кіраўнік ваеннага ведамства пагаварыў з прадстаўнікамі СМІ:

«Кожная прызыўная кампанія мае сваю асаблівасць. Восеньская прызыўная кампанія 2024 прайшла вельмі арганізавана. Мы ўнеслі некаторыя змены ў парадак прызыву. І на сённяшні дзень можна канстатаваць, што больш за 8 тыс. маладых людзей па ўсёй краіне прынялі прысягу і папоўнілі Узброеныя Сілы.

Праблема недаўкамплектаванасці, якая існавала пэўны час ва Узброеных Сілах, вось ужо два гады як вырашана. Сёння хлопцаў, якія гатовыя служыць у арміі, больш, чым ёсць пасад.

Асаблівасцю гэтай прызыўной кампаніі было тое, што ў ваенкаматы было вельмі шмат званкоў ад маладых людзей з адным пытаннем: “чаму мяне не бяруць у армію?” Гэта гаворыць пра тое, што змянілася ў маладых людзей стаўленне да арміі, што павысіўся яе прэстыж.

Людзі сталі разумець, што сёння абарона Радзімы, гэта не проста словы, а трэба на справе даказваць і паказваць, што мы гатовыя абараняць нашу Радзіму.

Наперадзе нашых маладых хлопцаў чакае напружаная баявая вучоба. Лёгкай службы ніхто не абяцае. Яе не будзе. Воінская служба мае на ўвазе пад сабой поўнае напружанне ўсіх сіл: і маральных, і фізічных. Служыць Радзіме неабходна з поўнай аддачай.

У працэсе баявой падрыхтоўкі маладыя людзі атрымаюць кожны сваю ваенна-ўліковую спецыяльнасць. Мы значна перагледзелі праграмы баявой падрыхтоўкі і сам падыход да яе арганізацыі. Галоўная частка падрыхтоўкі – гэта, вядома, палявыя заняткі.

У аснове будзе тактыка, агнявая падрыхтоўка, інжынерная падрыхтоўка, тактычная медыцына, барацьба з дронамі і іншыя прадметы. Вядома ж, і фізічная падрыхтоўка, якая, перш за ўсё, неабходная маладым хлопцам, каб вынесці тыя нагрузкі, якія на іх будуць ускладзены.

Мы разумеем і падзяляем хваляванне бацькоў за сваіх сыноў. Літаральна месяц таму мы ўшаноўвалі лепшых ваеннаслужачых разам з іх бацькамі. Гаварылі словы падзякі і атрымлівалі словы падзякі ад бацькоў за тое, што іх дзеці ўзмужнелі, набылі сяброў, адчулі што такое сапраўдная школа мужчынскага сяброўства і жыцця.

Таму магу сказаць бацькам: не трэба моцна хвалявацца. На сённяшні дзень ва Узброеных Сілах у пунктах пастаяннай дыслакацыі створаны на добрым узроўні ўсе неабходныя і бытавыя ўмовы, і забеспячэнне формай адзення і харчаваннем. Бо ў прыярытэце нашай дзяржавы – клопат аб людзях, у арміі ў тым ліку.

Але мяжы дасканаласці няма. Мы, вядома, будзем рухацца і далей, павышаючы прэстыж ваеннай службы для таго, каб нашы людзі адчувалі абарону і былі ўпэўненыя, што мы захаваем мірнае неба над намі».

***

У рамках цырымоніі прыняцця Ваеннай прысягі ў 72 АВЦ радавы Ягор Рамановіч зрабіў сваёй дзяўчыне Лізавеце прапанову.

***

Больш за 200 навабранцаў 5-й асобнай брыгады спецыяльнага прызначэння прынялі Ваенную прысягу.

Са знамянальнай падзеяй ваеннаслужачых павіншаваў начальнік Генеральнага штаба Узброеных Сіл – першы намеснік Міністра абароны Рэспублікі Беларусь генерал-маёр Павел Муравейка і падзякаваў бацькам воінаў за выхаванне сыноў:

«Вам выпаў гонар праходзіць службу ў 5-й асобнай брыгадзе спецыяльнага прызначэння сіл спецыяльных аперацый Узброеных Сіл Рэспублікі Беларусь. Гэта асаблівая воінская часць.

Многія пакаленні ваеннаслужачых, якія ў розныя гады праходзілі службу тут, з гонарам носяць імя воіна-спецназаўца, які атрымаў загартоўку ў легендарнай 5-й брыгадзе.

Наперадзе ў вас інтэнсіўная баявая вучоба, асваенне сучаснай ваеннай тэхнікі, удзел у выкананні адказных дзяржаўных задач па забеспячэнні ваеннай бяспекі краіны».

***

Навабранцы 361-й базы аховы і абслугоўвання (цэнтральных органаў ваеннага кіравання) прынялі Ваенную прысягу.

Памочнік Міністра абароны па ідэалагічнай рабоце ва Узброеных Сілах — начальнік галоўнага ўпраўлення ідэалагічнай работы Міністэрства абароны Беларусі генерал-маёр Леанід Касінскі павіншаваў абаронцаў Айчыны:

«Салдацкая праца бывае часам вельмі няпростай. І будзе складана, а часам вельмі складана. Але ўпэўнены, хлопцы з гонарам справяцца з усімі цяжкасцямі і выканаюць свой воінскі абавязак.

Я хачу падзякаваць прысутных тут бацькоў за выхаванне сыноў сапраўднымі патрыётамі, сапраўднымі мужчынамі, якія не хаваюцца ад цяжкасцяў, а смела глядзяць ім у вочы.

Хачу павіншаваць усіх з гэтай знамянальнай падзеяй, пажадаць міру, дабра і працвітання».

***

У Барысаве прайшла цырымонія прыняцця Ваеннай прысягі новым папаўненнем, прызваным для праходжання службы ў воінскія часці Паўночна-Заходняга аператыўнага камандавання Барысаўскага гарнізона.

Камандуючы войскамі ПЗАК генерал-маёр Аляксандр Бас павіншаваў ваеннаслужачых:

«Сёння я звяртаюся да новага папаўнення з заклікам быць годнымі прадаўжальнікамі слаўных баявых традыцый воінаў-франтавікоў, ветэранаў Узброеных Сіл, добрасумленна і сумленна выконваць свой воінскі абавязак па абароне нашай Радзімы – Рэспублікі Беларусь».

Не абышлося і без чуллівых момантаў. Гвардыі радавы Уладзіслаў Сіневіч зрабіў прапанову сваёй дзяўчыне Аляксандры. Яна сказала «Так!».

***

У Фаніпалі на вернасць Радзіме прысягнулі навабранцы 15-й зенітнай ракетнай брыгады і 483-га асобнага батальёна аховы і абслугоўвання ВПС і войск СПА.

Ваеннаслужачых павіншаваў камандуючы Ваенна-паветранымі сіламі і войскамі супрацьпаветранай абароны Узброеных Сіл Беларусі генерал-маёр Андрэй Лук’яновіч.

Камандуючы адзначыў, што хлопцам выпаў гонар служыць у няпросты час, але выказаў упэўненасць у тым, што яны з годнасцю пранясуць праз усю службу гордае званне абаронца Айчыны і апраўдаюць аказаны ім высокі давер.

***

У Гродзенскім гарнізоне каля падножжа Кургана Славы навабранцы ва ўрачыстай абстаноўцы прынялі Ваенную прысягу.

Клятву на вернасць Радзіме вымавілі каля 400 навабранцаў, якія папоўнілі рады 6 амбр , 557 ібр, 62 зрп , 76 апс, 250 абаа, 1 зрп і іншых воінскіх чацей гарнізона.

З прыняццем ваеннай прысягі навабранцаў павіншаваў камандуючы войскамі Заходняга аператыўнага камандавання генерал-маёр Вадзім Сураў.

***

У 120-й асобнай гвардзейскай механізаванай брыгадзе прынялі Ваенную прысягу звыш 300 ваеннаслужачых новага папаўнення.

З важнай падзеяй новае папаўненне павіншаваў намеснік камандуючага войскамі Паўночна-Заходняга аператыўнага камандавання генерал-маёр Ігар Казлоў.

***

Навабранцы 30-й асобнай чыгуначнай брыгады прынялі Ваенную прысягу.

Намеснік Міністра абароны па тылу — начальнік тылу Узброеных Сіл Рэспублікі Беларусь генерал-маёр Андрэй Бурдыка павіншаваў ваеннаслужачых з гэтай урачыстай падзеяй.

Фота Яна Гарбанюка, Алега Някала, Канстанціна Бяляўскага, Паўла Сурынава, Аляксандра Палятаева, Аляксандра Сявенкі, Лады Дацэнка, з архіва 30 ачбр