II Мінская міжнародная канферэнцыя па еўразійскай бяспецы

У Мінску праходзіць II Мінская міжнародная канферэнцыя па еўразійскай бяспецы.

У ёй бяруць удзел Міністр абароны Рэспублікі Беларусь генерал-лейтэнант Віктар Хрэнін і начальнік Генеральнага штаба Узброеных Сіл - першы намеснік Міністра абароны Рэспублікі Беларусь генерал-маёр Павел Муравейка.

З прывітальным словам перад удзельнікамі канферэнцыі выступіў Прэзідэнт Рэспублікі Беларусь Аляксандр Лукашэнка:

— На жаль, сёння можна пералічыць на пальцах адной рукі пляцоўкі, дзе вяліся б адкрытыя, канструктыўныя экспертныя дыскусіі на тэму міжнароднай бяспекі. А нам жыццёва неабходна сумленная гутарка і бесстароннія ацэнкі адбываючыхся падзей.

Прэзідэнт адзначыў, што першая канферэнцыя па пытаннях еўразійскай бяспекі, якая прайшла ў Мінску ў 2023 годзе, здзівіла нават самых заўзятых скептыкаў, якія сумняваліся, што ў такі неспакойны час можна сабраць прадстаўнікоў і Захаду, і Усходу. Яе вынікам стаў праект Хартыі разнастайнасці і шматпалярнасці ў XXI стагоддзі, праца над якой будзе працягнута падчас цяперашняй канферэнцыі.

— Мы бачым гэты дакумент усебаковым і ўсёабдымным, без прывязкі да канкрэтнага рэгіёну, каб садзейнічаць фарміраванню кансенсусу ў сферы бяспекі, — падкрэсліў Кіраўнік дзяржавы.

У канферэнцыі бяруць удзел больш за 600 прадстаўнікоў з больш як 40 дзяржаў.

Падчас працоўных сесій канферэнцыі будуць разгледжаны наступныя пытанні:

— Сталая актуальнасць «жорсткай бяспекі»: новыя ваенныя фактары, умацаванне даверу і гарантыі бяспекі ў Еўразіі;

— эканамічная бяспека ў сучасным свеце;

— Еўразійская хартыя разнастайнасці і шматпалярнасці ў XXI стагоддзі.

Фота Яна Гарбанюка і БЕЛТА