Круглы стол на тэму: “Актуальныя праблемы забеспячэння бяспекі Саюзнай дзяржавы”

Па ініцыятыве Дзяржаўнага сакратарыята Савета Бяспекі ў Акадэміі нацыянальнай бяспекі Рэспублікі Беларусь прайшоў круглы стол на тэму: “Актуальныя праблемы забеспячэння бяспекі Саюзнай дзяржавы”.

Адкрываючы мерапрыемства, намеснік Дзяржаўнага сакратара Савета Бяспекі генерал-маёр Аляксандр Невяроўскі адзначыў высокі ўзровень супрацоўніцтва міністэрстваў, ведамстваў і навукова-экспертнай супольнасці пры прапрацоўцы дакументаў стратэгічнага планавання:

— Такое паспяховае ўзаемадзеянне зацікаўленых міністэрстваў і ведамстваў, навукова-экспертнай супольнасці ўжо не першы раз з’яўляецца залогам высокай якасці і комплекснага характару прапрацоўкі дакументаў стратэгічнага планавання.

Апошнія прыклады такога эфектыўнага супрацоўніцтва – праца над абноўленай Канцэпцыяй інфармацыйнай бяспекі Саюзнай дзяржавы, а таксама Канцэпцыяй нацыянальнай бяспекі Рэспублікі Беларусь і Ваеннай дактрынай, якія былі зацверджаны вясной гэтага года Усебеларускім народным сходам.

Генерал-маёр Аляксандр Невяроўскі акцэнтаваў увагу на тым, што сёння неабходна напоўніць інфармацыйную прастору аб’ектыўнай інфармацыяй аб Канцэпцыі бяспекі Саюзнай дзяржавы.

— Трансліраваць наратывы, закладзеныя ў дакуменце, даходліва растлумачыць людзям, што ім дае яго прыняцце, якія гарантыі бяспекі яны атрымаюць, як будзе гарантавацца бяспека Саюзнай дзяржавы ў цэлым, - адзначыў Аляксандр Невяроўскі. — Удалося сінхранізаваць падыходы ў ацэнцы існуючага становішча, пагроз і іх крыніц, мер па абароне нашых стратэгічных інтарэсаў як на нацыянальным, так і на міждзяржаўным узроўнях.

Начальнік інфармацыйна-аналітычнага ўпраўлення Дзяржаўнага сакратарыята Савета Бяспекі Рэспублікі Беларусь Аляксей Банькоўскі расказаў аб навелах Канцэпцыі бяспекі Саюзнай дзяржавы.

Аляксей Банькоўскі адзначыў, што ў гэтым дакуменце ўпершыню абноўлены паняційна-катэгарыйны апарат, а таксама афіцыйна замацаваны і вызначаны такія базавыя паняцці як стратэгічныя інтарэсы, бяспека, пагроза бяспецы, гарантаванне бяспекі, сістэма забеспячэння бяспекі Саюзнай дзяржавы. Сфармуляваны прыярытэтныя напрамкі забеспячэння бяспекі Саюзнай дзяржавы:

— Канцэпцыя бяспекі Саюзнай дзяржавы - прынцыпова новы дакумент па структуры і зместу. У ёй абноўлены паняційна-катэгарыйны апарат, знайшлі сваё адлюстраванне пасылы ад беларускага насельніцтва і грамадзянскай супольнасці, асноўныя мерапрыемствы па забеспячэнні ўнутранай стабільнасці і ўстойлівасці.

Вялікае значэнне адыграў той факт, што распрацоўка Канцэпцыі фактычна ажыццяўлялася адначасова з прыняццем у Беларусі важнейшых дакументаў стратэгічнага планавання — Канцэпцыі нацыянальнай бяспекі Рэспублікі Беларусь і Ваеннай дактрыны.

Гэта дазволіла не толькі выкарыставаць існуючыя напрацоўкі, але і забяспечыць іх высокую ўзаемасувязь і пераемнасць.

У новай Канцэпцыі бяспекі Саюзнай дзяржавы знайшлі адлюстраванне навелы, замацаваныя ў Канцэпцыі нацыянальнай бяспекі Рэспублікі Беларусь. Гэта канкрэтныя пасылы, якія зыходзілі ад насельніцтва і суб’ектаў грамадзянскай супольнасці, якія датычацца важнейшых пытанняў забеспячэння нацыянальнай бяспекі не толькі Беларусі, але і Расіі.

З асноўных можна вылучыць наступныя:

- абарона інстытута традыцыйнай сям’і як саюза жанчыны і мужчыны па нараджэнні;

- пераадоленне дыспрапорцый рэгіянальнага развіцця;

- павышэнне ўзроўню сацыяльнай адказнасці бізнес-супольнасці.

У праекце абноўленай Канцэпцыі бяспекі Саюзнай дзяржавы замацаваны напрамкі засяроджвання сумесных намаганняў у сферы ўмацавання ваеннай бяспекі Саюзнай дзяржавы.

Іх прадставіў намеснік начальніка Генеральнага штаба Узброеных Сіл па навуковай рабоце, кандыдат тэхнічных навук, палкоўнік Віктар Тумар:

«Гарантаваная абарона насельніцтва, суверэнітэту, незалежнасць нашых краін, недатыкальнасць тэрыторыі Саюзнай дзяржавы і магчымасць яе паступальнага развіцця - адно з найважнейшых пытанняў.

Дакумент Канцэпцыі бяспекі Саюзнай дзяржавы мае дакладныя прынцыпы і пастулаты. Стратэгічнымі мэтамі ўмацавання ваеннай бяспекі Саюзнай дзяржавы з’яўляецца стварэнне ўмоў для мірнага сацыяльна-эканамічнага развіцця Саюзнай дзяржавы, абарона стратэгічных інтарэсаў дзяржавы ад ваенных пагроз.

Дасягненне гэтых стратэгічных мэт забяспечваецца па цэлым шэрагу ключавых напрамкаў.

Перад намі цэлы спектр важнейшых задач, якія мы вырашаем у рамках Саюзнай дзяржавы: сумесная абаронная палітыка, каардынацыя дзейнасці ў галіне ваеннага будаўніцтва, развіццё Узброеных Сіл дзяржаў — удзельніц, сумеснае выкарыстанне ваеннай інфраструктуры і прыняцце іншых мер для падтрымання абараназдольнасці Саюзнай дзяржавы.

Праблема забеспячэння бяспекі сёння займае цэнтральнае месца ў агульным інтэграцыйным парадку дня. У шырокім сэнсе гэта сфера ахоплівае ўсе астатнія напрамкі інтэграцыйнага ўзаемадзеяння, паколькі і фінансава-эканамічныя, сацыяльныя, культурна-гуманітарныя і іншыя інтэграцыйныя мэты і задачы немагчыма вырашыць без забеспячэння надзейнай абароненасці нацыянальных інтарэсаў дзвюх дзяржаў ад знешніх і ўнутраных пагроз.

Сам факт збліжэння дзвюх дзяржаў, інтэграцыя фінансавых і эканамічных патэнцыялаў Расіі і Беларусі, выпрацоўка адзінай знешняй палітыкі, адзіных падыходаў да забеспячэння ваеннай бяспекі супярэчыць інтарэсам калектыўнага Захаду, выклікае негатыўную рэакцыю і актыўнае супрацьдзеянне».

Фота Паўла Матусевіча