Вынікі 64-га пасяджэння Савета міністраў абароны дзяржаў-удзельніц Садружнасці Незалежных Дзяржаў

5 чэрвеня 2013 года ў Мінску, пад старшынствам Міністра абароны Расійскай Федэрацыі генерала арміі Сяргея Кужугетавіча Шайгу адбылося чарговае, 64-е пасяджэнне Савета міністраў абароны дзяржаў-удзельніц Садружнасці Незалежных Дзяржаў (СМА СНД).

У рабоце СМА СНД прынялі ўдзел дэлегацыі абаронных ведамстваў Азербайджанскай Рэспублікі, Рэспублікі Арменія, Рэспублікі Беларусь, Рэспублікі Казахстан, Кыргызскай Рэспублікі, Рэспублікі Малдова, Расійскай Федэрацыі, Рэспублікі Таджыкістан, Рэспублікі Узбекістан і Украіны.

У адпаведнасці з парадкам пасяджэння было разгледжана больш за дваццаць пытанняў па розных напрамках шматбаковага ваеннага ўзаемадзеяння міністэрстваў абароны дзяржаў Садружнасці.

У Садружнасці Незалежных Дзяржаў сфарміравалася традыцыя прысвячаць пэўныя гады сацыяльна значных падзей сумеснай гісторыі, важным абласцям жыццядзейнасці краін Садружнасці і напрамкам іх супрацоўніцтва - у мэтах акцэнтавання на іх увагі дзяржавы і грамадскасці. Улічваючы высокую грамадска-дзяржаўную значнасць ратнай работы ў забеспячэнні нацыянальнай і сумеснай бяспекі дзяржаў-удзельніц СНД і іх эканамічнага развіцця, удзельнікі пасяджэння адобрылі прапанову Сакратарыята СМА СНД аб аб'яўленні 2017 года - Годам Абаронцы Айчыны ў Садружнасці Незалежных Дзяржаў. У далейшым гэтае пытанне будзе ўнесена на разгляд чарговага пасяджэння Савета кіраўнікоў дзяржаў СНД.

Улічваючы важнасць і актуальнасць развіцця інтэграцыйных працэсаў у ваеннай сферы, удзельнікі пасяджэння ўзгаднілі пералік сумесных мерапрыемстваў узброеных сіл дзяржаў-удзельніц Садружнасці Незалежных Дзяржаў, якія плануюцца да правядзення ў 2014 годзе.

У кантэксце паглыблення ваеннага супрацоўніцтва былі разгледжаны пытанні: аб унясенні змяненняў у Пагадненне аб выкарыстанні сістэм спадарожнікавай сувязі ваеннага прызначэння і іх далейшым удасканаленні ад 12 сакавіка 1993 года; аб праекце Пагаднення аб узаемадзеянні інжынерных войскаў узброеных сіл дзяржаў-удзельніц СНД у галіне гуманітарнага размініравання; аб праекце Пагаднення аб супрацоўніцтве ў галіне топагеадэзічнага і навігацыйнага забеспячэння ўзброеных сіл дзяржаў-удзельніц СНД; аб кантрольных узроўнях магутнасці дозы гама-выпраменьвання на тэрыторыях дзяржаў-удзельніц СНД; аб супрацоўніцтве міністэрстваў абароны дзяржаў-удзельніц СНД у галіне кантролю за тэхнічным станам боепрыпасаў.

У рамках далейшага развіцця аб'яднанай сістэмы супрацьпаветранай абароны дзяржаў-удзельніц Садружнасці Незалежных Дзяржаў (АС СПА СНД) і ў сувязі з утварэннем ва Узброеных Сілах Расійскай Федэрацыі Войскаў паветрана-касмічнай абароны, кіраўнікі ваенных ведамстваў узгаднілі новую рэдакцыю Палажэння аб Каардынацыйным Камітэце па пытаннях супрацьпаветранай абароны пры СМА СНД і фінансаванне ўдасканалення АС СПА СНД у 2014 годзе. Міністры абароны краін Садружнасці таксама прынялі рашэнне аб правядзенні ў перыяд са жніўня па кастрычнік сумеснага вучэння з баявой стральбой войскаў (сіл) АС СПА СНД "Баявая Садружнасць-2013".

У ходзе пасяджэння СМА СНД быў прааналізаваны стан бяспекі палётаў авіяцыі ўзброеных сіл дзяржаў Садружнасці за 2012 год.

Савет міністраў абароны працягнуў лінію развіцця партнёрскага ваеннага супрацоўніцтва дзяржаў-удзельніц СНД на аснове ўдасканалення нарматыўнай прававой базы і яе практычнага ўвасаблення ў шырокім спектры сумесных шматбаковых мерапрыемстваў. У прыватнасці, на пасяджэнні быў узгоднены механізм практычнага ўзаемадзеяння юрыдычных службаў міністэрстваў абароны дзяржаў-удзельніц СНД.

Улічваючы важнасць і практычную запатрабаванасць далейшага развіцця супрацоўніцтва ў галіне архіўнай справы, члены СМА СНД намецілі напрамкі сумеснай работы па фарміраванню Адзінага міжархіўнага даведніка ў інтарэсах ваенных ведамстваў краін Садружнасці.

На пасяджэнні былі падведзены вынікі II Міжнароднага конкурсу на лепшы журналісцкі твор, прысвечаны 20-годдзю ўтварэння Савета міністраў абароны дзяржаў-удзельніц Садружнасці Незалежных Дзяржаў, а таксама прынята рашэнне аб арганізацыі V Міжнароднага конкурсу ваенна-прафесійнага майстэрства ваеннаслужачых дружалюбных войскаў "Воін Садружнасці" ў 2013 годзе.

Рашэнні, якія былі прыняты ў ходзе пасяджэння СМА СНД, накіраваны на ўдасканаленне сістэмы шматбаковага ваеннага супрацоўніцтва ў фармаце Садружнасці Незалежных Дзяржаў і спрыяюць развіццю ўстойлівага партнёрскага ўзаемадзеяння ў ваеннай сферы на аснове ўліку агульных, рэгіянальных і нацыянальных інтарэсаў.

64-е пасяджэнне Савета міністраў абароны дзяржаў-удзельніц СНД прайшло ў канструктыўнай і дзелавой абстаноўцы.