Шчырая размова з Прэзідэнтам

З першых хвілін было прыкметна, што наведванню 38 одшбр Аляксандр Лукашэнка надае важнае значэнне. Ён уважліва, задаючы шмат дадатковых пытанняў, заслухаў даклады камандуючага сіламі спецаперацый генерал-маёра Вадзіма Дзенісенка і камандзіра 38 одшбр гвардыі палкоўніка Аляксандра Ільюкевіча.

Галоўнакамандуючы азнаёміўся з узбраеннем і ваеннай тэхнікай, якая складаецца на ўзбраенні злучэння. На пляцы была выстаўлена армейская аўтатэхніка МАЗ і МЗКЦ, бронетранспарцёры БТР-70МБ-1 і БТР-80, у тым ліку з беларускімі супрацькумулятыўнымі экранамі ПКЭ, найноўшая бронемашына "Кайман", парашутная платформа П-7, артылерыйскае ўзбраенне, радыёрэлейная станцыя Р-434 "Цытрус" і іншыя ўзоры.

Далей Кіраўніку дзяржавы паказалі, як у брыгадзе праходзяць заняткі па баявой падрыхтоўцы - у спортгарадке і спартзале, на паласе перашкод і паветрана-дэсантным комплексе.

Аляксандр Лукашэнка ўважліва азнаёміўся і з бытавымі ўмовамі дэсантнікаў.

Наведванне 38 одшбр доўжылася некалькі гадзін. У завяршэнне візіту Аляксандр Лукашэнка сустрэўся з афіцэрамі злучэння і камандзірамі воінскіх часцей Брэсцкага гарнізона. Падымаліся надзённыя праблемы - як дзяржавы ў цэлым, так і арміі.

У прыватнасці, Кіраўнік дзяржавы нагадаў аб абноўленай нядаўна Ваеннай дактрыне Беларусі, якая была прыведзена ў адпаведнасць з сучаснымі выклікамі.

- Яшчэ раз нагадаю: фронт на фронт ваяваць не будзем, няма такой вайны, - адзначыў ён. - Гэта лакальныя войны. І гібрыдныя войны. Гэта не толькі стральба (гэта потым). Пачынаецца з інфармацыйных войнаў, і мы гэта бачым сёння.

Фота: прэс-служба Прэзідэнта