Чарговы выпуск афіцэраў факультэта Генеральнага штаба Узброеных Сіл Ваеннай акадэміі Беларусі

У Палацы Рэспублікі прайшоў чарговы выпуск афіцэраў факультэта Генеральнага штаба Узброеных Сіл Ваеннай акадэміі Рэспублікі Беларусь

Падзяліць гэты памятны дзень з новым пакаленнем афіцэраў-кіраўнікоў прыбыў Міністр абароны Рэспублікі Беларусь генерал-лейтэнант Віктар Хрэнін, а таксама начальнік Генеральнага штаба Узброеных Сіл — першы намеснік Міністра абароны Рэспублікі Беларусь генерал-маёр Павел Муравейка, начальнікі структурных падраздзяленняў Міністэрства абароны, Генеральнага штаба і Узброеных Сіл, прадстаўнікі іншых сілавых структур.

У гэтым годзе дыпломы магістраў і нагрудныя знакі аб заканчэнні факультэта атрымалі 133 афіцэры, з іх – 19 аператыўна-стратэгічнага ўзроўню і 114 аператыўна-тактычнага ўзроўню. Па выніках навучання нагрудным знакам «За выдатнае заканчэнне ваеннай навучальнай установы» ўзнагароджаны восем слухачоў.

За перыяд навучання на факультэце Генштаба афіцэры атрымалі тэарэтычныя веды і практычныя навыкі ў галіне нацыянальнай бяспекі, геапалітыкі, ваеннай стратэгіі, аператыўнага мастацтва, дзяржаўнага і ваеннага кіравання.

Дарэчы, у сценах факультэта прайшлі навучанне спецыялісты не толькі Узброеных Сіл, але і ўнутраных войск Міністэрства ўнутраных спраў, Дзяржаўнага пагранічнага камітэта.

Міністр абароны Рэспублікі Беларусь генерал-лейтэнант Віктар Хрэнін:

— Сёння знамянальны дзень у жыцці Узброеных Сіл Рэспублікі Беларусь. Беларуская армія папаўняецца афіцэрамі, якія атрымалі вышэйшую ваенную адукацыю ў сценах нашай Ваеннай акадэміі.

Традыцыйна гэты выпуск праходзіць напярэдадні галоўнага свята беларускай дзяржаўнасці — Дня Незалежнасці. Але ў гэтым годзе ёсць яшчэ адна дата – 85-годдзе пачатку Вялікай Айчыннай вайны. Падзеі апошняга часу ўсё часцей прымушаюць нас думкамі вяртацца ў перадваенны 1941 год і праводзіць гістарычныя паралелі з сённяшнім днём.

Абстаноўка каля нашых граніц украй нестабільная і носіць эскалацыйны характар. Па той бок нашых рубяжоў узмацняюцца групоўкі войск НАТА, удасканальваецца інфраструктура, нарошчваюцца ваенныя бюджэты суседніх дзяржаў, гучаць гучныя мілітарысцкія заявы палітыкаў. Прыкладаюцца намаганні да зацягвання гарачага канфлікту, развязанага Захадам ва Украіне, і нават яго пашырэння. Сёння мы ў поўнай меры адчуваем адкрытую спробу ўцягнуць Беларусь у вайну.

Мы ўсё больш пераконваемся ў тым, што незалежнасць краіны даецца няпростай, а часта, як гаворыць наш Прэзідэнт, вельмі дарагой цаной.

У гэтых умовах дзяржавай робіцца ўсё, каб захаваць мірнае неба над нашай краінай, у тым ліку, не дапусціць паўтарэння памылак лета 1941-га. Пры гэтым, адным з галоўных фактараў стрымлівання тых, хто выношвае агрэсіўныя планы супраць нашай краіны, з’яўляюцца Узброеныя Сілы – добра аснашчаныя і абучаныя, гатовыя да выканання задач у любых умовах абстаноўкі.

У вырашэнні задач, вызначаных нашым Галоўнакамандуючым – Прэзідэнтам Рэспублікі Беларусь па якасным пераўтварэнні арміі і ўдасканальванні сістэмы абароны краіны, асаблівае месца адводзіцца вам — выпускнікам факультэта Генеральнага штаба.

Вы атрымалі выдатную адукацыю. Сёння на вашы плечы кладзецца адказнасць за павышэнне ўзроўню баявой і мабілізацыйнай гатоўнасці аб’яднанняў, злучэнняў і воінскіх часцей, вывучкі і зладжанасці органаў ваеннага кіравання і войск, навучанне іх сучасным спосабам вядзення ўзброенай барацьбы.

Пры гэтым галоўны акцэнт трэба зрабіць на падрыхтоўцы падначаленых афіцэраў. Як вызначыў наш Галоўнакамандуючы, афіцэр – аб’ект нумар адзін. Будзе падрыхтаваны афіцэр, значыць будзе падрыхтаваны і яго асабовы склад.

Упэўнены, вам пад сілу вырашэнне самых складаных задач забеспячэння ваеннай бяспекі краіны. Бо выпускнікі факультэта Генеральнага штаба – гэта людзі, якія першапачаткова выбралі сваім лёсам служэнне Айчыне. Гэта людзі, якія ўласным прафесіяналізмам, бездакорнай службай атрымалі права кіраваць вялікімі воінскімі калектывамі. Гэта сапраўдныя ваенныя прафесіяналы. І самае галоўнае, выпускнік Ваеннай акадэміі, факультэта Генеральнага штаба – гэта заўсёды чалавек з глыбокім дзяржаўным мысленнем і патрыёт роднай Беларусі.

Віншую ўсіх прысутных са знамянальнай падзеяй у жыцці Узброеных Сіл – выпускам факультэта Генеральнага штаба! Віншую выпускнікоў з паспяховым заканчэннем вучобы. Поспехаў Вам у ратнай працы на карысць нашай Радзімы — Рэспублікі Беларусь!

Лейтэнант Анастасія Банэт, «Ваяр», фота Арцёма Берасценя