Збор па тэрытарыяльнай абароне

У Віцебскай вобласці праходзіць збор па тэрытарыяльнай абароне з кіруючым складам органаў кіравання тэрытарыяльнай абароны.

Тэма — «Тэрытарыяльная абарона як асноўны фактар забеспячэння стабільнай абстаноўкі ва ўмовах ваеннага часу».

У рамках тэарэтычнай часткі ўдзельнікі збору заслухалі даклады, якія датычацца ваенна-палітычнай абстаноўкі, што складваецца вакол Беларусі, а таксама асноў тэрытарыяльнай абароны.

Аб выніках будаўніцтва і развіцця тэрытарыяльнай абароны, яе перспектывах на будучую пяцігодку расказаў начальнік Генеральнага штаба Узброеных Сіл — першы намеснік Міністра абароны Рэспублікі Беларусь генерал-маёр Павел Муравейка.

Праграма збору накіравана на адпрацоўку ключавых навыкаў, неабходных для эфектыўнай арганізацыі тэрытарыяльнай абароны. Вучэнні ўключаюць заняткі па арганізацыі засадных дзеянняў, абароне ад беспілотных лятальных апаратаў, інжынерным абсталяванні раёнаў размяшчэння.

За ходам практычных дзеянняў назірае начальнік Генеральнага штаба Узброеных Сіл — першы намеснік Міністра абароны Рэспублікі Беларусь генерал-маёр Павел Муравейка.

Генерал-маёр Павел Муравейка:

— Тэрытарыяльная абарона — гэта складовы элемент у сістэме забеспячэння ваеннай бяспекі нашай краіны. Толькі зрабіўшы абарону дзяржавы ўсенароднай справай, можна дасягнуць поспеху і захаваць незалежнасць, тэрытарыяльную цэласнасць і свабоду.

Зыходзячы з гэтага, да тэрытарыяльнай абароны прад’яўляюцца такія ж жорсткія патрабаванні, як і да сучаснай ваеннай арганізацыі дзяржавы. З той толькі розніцай, што ў тэрытарыяльнай абароне праходзяць службу і выконваюць задачы людзі, непасрэдна прывязаныя да тых месцаў, дзе яны нарадзіліся, выраслі, да тых раёнаў і сельскіх саветаў, дзе, уласна, знаходзіцца іх жыллё. Гэта, па-першае, стымулюе і павышае адказнасць да выканання задач, па-другое, максімальна дазваляе выкарыстоўваць іх магчымасці па веданні мясцовасці, тэрыторыі, умоў таго ці іншага рэгіёна. Ну і, па-трэцяе, гэта садзейнічае назапашванню адпаведных рэсурсаў у тых раёнах, якія ёсць у нас на тэрыторыі краіны.

Сёння ў адным з эпізодаў мы ўбачылі, што ўзровень падрыхтоўкі сучасных прадстаўнікоў тэрытарыяльных войскаў дастаткова высокі. Яны актыўна асвойваюць і выкарыстоўваюць тыя прыёмы і спосабы, якія сёння актуальныя для сучасных ваенных канфліктаў. Гэта і супрацьдронавая барацьба, і стварэнне сістэмы загарод, і забеспячэнне ўласнай жывучасці, і захаванне жыцця ваеннаслужачых у рамках вядзення баявых дзеянняў, і максімальнае выкарыстанне мясцовай прамысловай базы, рэсурсаў, ландшафту.

Тое, што паказалі сёння, — гэта сучасны падыход да элементаў забеспячэння бяспекі дзяржавы адносна аднаго з раёнаў нашай краіны.

Да тэрытарыяльнай абароны мы цяпер прад’яўляем павышаныя патрабаванні. Колькасць ваеннаабавязаных і колькасць мерапрыемстваў, якія праводзяцца з органамі кіравання тэрытарыяльнай абароны і падраздзяленнямі тэрытарыяльных войск, кожны год будзе павялічвацца. Мы будзем накіроўваць на гэтыя мэты прыкладна трэць рэсурсу нашых ваеннаабавязаных, каб ажыццявіць падрыхтоўку ва ўсіх кутках нашай краіны.

На сённяшні дзень у кожнай вобласці праходзіць прыкладна 3–4 камандна-штабныя вучэнні з адмабілізаваннем ваеннаабавязаных і разгортваннем штабоў тэрытарыяльнай абароны, падраздзяленняў тэрытарыяльных войск, выкананнем імі задач адносна тых умоў, у якіх размешчаны тыя ці іншыя рэгіёны.

Сёння ў нас праходзіць планавае мерапрыемства. Ваеннаабавязаных прызвалі месяц таму, яны прайшлі адпаведную падрыхтоўку на вучэбна-матэрыяльнай базе, створанай у раёне. Для іх падрыхтоўкі прыцягваліся высокакваліфікаваныя спецыялісты-інструктары, якія навучылі іх супрацьдронавым дзеянням, сучасным дзеянням двойкамі, тройкамі, забеспячэнню і арганізацыі інжынернага фартыфікацыйнага абсталявання такіх элементаў, як блокпост, вартавы пост, сакрэт.

Больш за тое, да гэтых мерапрыемстваў актыўна прыцягваюцца тэрытарыяльныя органы ўнутраных спраў МУС, Міністэрства па надзвычайных сітуацыях.

Гэта значыць тэрытарыяльная абарона — гэта комплекс мерапрыемстваў на тэрыторыі раёна або вобласці адносна тых умоў, у якіх гэты раён існуе.

Акрамя таго, для кіраўнікоў мясцовых органаў улады і службовых асоб, якія адказваюць за тэрытарыяльную абарону, а таксама ваенных камісараў правялі практычныя заняткі з выставай узбраення і тэхнікі, стральбой са стралковай зброі і дэманстрацыяй магчымасцей беспілотнікаў.

Лейтэнант Анастасія Банэт, «Ваяр», фота Паліны Дзегцяровай